Кано́ны Пресвято́й Богоро́дице

для пе́ния на слу́жбах святы́м, име́ющим полиеле́й, но не име́ющим Богоро́дичного кано́на в Мине́е наряду́

ОГЛАВЛЕНИЕ

Кано́н Пресвято́й Богоро́дицы из Часосло́ва, глас 8.. 2

Кано́н Пресвято́й Богоро́дицы из Окто́иха, глас 8.. 7

Богослужебное последование размещено на сайте

Последование Богослужений наряду https://Последование.РФ

Телеграм-канал сайта: https://t.me/posledovanie

Телеграм-чат сайта: https://t.me/ChatPosledovanie

Макс-канал сайта: https://max.ru/posledovanie

Группа сайта во ВКонтакте: https://vk.com/posledovanie

Поддержать проект: https://Последование.РФ/donate

2025 г.

Кано́н Пресвято́й Богоро́дицы из Часосло́ва, глас 8

Песнь 1:

Ирмос: Во́ду проше́д, я́ко су́шу,/ и еги́петскаго зла избежáв,/ изрáильтянин вопия́ше:// Избáвителю и Бо́гу на́шему пои́м.

Припев: Пресвята́я Богоро́дице, спаси́ нас.

Тропарь: Мно́гими содержи́мь напáстьми, к Тебе́ прибега́ю, спасе́ния иски́й: о, Мáти Сло́ва и Де́во, от тя́жких и лю́тых мя спаси́.

Тропарь: Страсте́й мя смущáют прило́зи, мно́гаго уны́ния испо́лнити мою́ ду́шу; умири́, Отрокови́це, тишино́ю Сы́на и Бо́га Твоего́, Всенепоро́чная.

Тропарь: Спáса ро́ждшую Тя и Бо́га, молю́, Де́во, избáвитися ми лю́тых: к Тебе́ бо ны́не прибегáя, простирáю и ду́шу и помышле́ние.

Тропарь: Неду́гующа те́лом и душе́ю, посеще́ния Боже́ственнаго и промышле́ния от Тебе́ сподо́би, еди́на Богомáти, я́ко блага́я, Благáго же Роди́тельница.

Песнь 3:

Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты ме́не утверди́ в любви́ Твое́й,/ желáний крáю, ве́рных утвержде́ние,// Еди́не Человеколю́бче.

Припев: Пресвята́я Богоро́дице, спаси́ нас.

Тропарь: Предстáтельство и покро́в жи́зни моея́ полагáю Тя, Богороди́тельнице Де́во: Ты мя окорми́ ко пристáнищу Твоему́, благи́х вино́вна; ве́рных утвержде́ние, еди́на Всепе́тая.

Тропарь: Молю́, Де́во, душе́вное смуще́ние и печа́ли моея́ бу́рю разори́ти: Ты бо, Богоневе́стная, нача́льника тишины́ Христа́ родилá еси́, еди́на Пречи́стая.

Тропарь: Благоде́теля ро́ждши до́брых вино́внаго, благодея́ния бога́тство всем источи́, вся бо мо́жеши, я́ко си́льнаго в кре́пости Христа́ ро́ждши, Богоблаже́нная.

Тропарь: Лю́тыми неду́ги и боле́зненными страстьми́ истязáему, Де́во, Ты ми помози́: исцеле́ний бо неоску́дное Тя зна́ю сокро́вище, Пренепоро́чная, неиждивáемое.

Песнь 4:

Ирмос: Услы́шах, Го́споди,/ смотре́ния Твоего́ тáинство,/ разуме́х дела́ Твоя́// и прослáвих Твое́ Божество́.

Припев: Пресвята́я Богоро́дице, спаси́ нас.

Тропарь: Страсте́й мои́х смуще́ние, ко́рмчию ро́ждшая Го́спода, и бу́рю утиши́ мои́х прегреше́ний, Богоневе́стная.

Тропарь: Милосе́рдия Твоего́ бе́здну призывáющу подáждь ми, я́же Благосе́рдаго ро́ждшая и Спáса всех пою́щих Тя.

Тропарь: Наслаждáющеся, Пречи́стая, Твои́х даровáний, благодáрственное воспевáем пе́ние, ве́дуще Тя Богомáтерь.

Тропарь: На одре́ боле́зни моея́ и не́мощи низлежáщу ми, я́ко благолюби́ва, помози́, Богоро́дице, еди́на Присноде́во.

Тропарь: Наде́жду и утвержде́ние и спасе́ния сте́ну недви́жиму иму́ще Тя, Всепе́тая, неудо́бства вся́каго избавля́емся.

Песнь 5:

Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою// Твой мир подáждь нам, Человеколю́бче.

Припев: Пресвята́я Богоро́дице, спаси́ нас.

Тропарь: Испо́лни, Чи́стая, весе́лия се́рдце мое́, Твою́ нетле́нную даю́щи ра́дость, весе́лия ро́ждшая Вино́внаго.

Тропарь: Избáви нас от бед, Богоро́дице Чи́стая, ве́чное ро́ждши избавле́ние, и мир, всяк ум преиму́щий.

Тропарь: Разреши́ мглу прегреше́ний мои́х, Богоневе́сто, просвеще́нием Твоея́ све́тлости, Свет ро́ждшая Боже́ственный и преве́чный.

Тропарь: Исцели́, Чи́стая, души́ моея́ неможе́ние, посеще́ния Твоего́ сподо́бльшая, и здрáвие моли́твами Твои́ми подáждь ми.

Песнь 6:

Ирмос: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

Припев: Пресвята́я Богоро́дице, спаси́ нас.

Тропарь: Сме́рти и тли я́ко спасл есть, Сам Ся издáв сме́рти, тле́нием и сме́ртию мое́ естество́, я́то бы́вшее, Де́во, моли́ Го́спода и Сы́на Твоего́, враго́в злоде́йствия мя избáвити.

Тропарь: Предстáтельницу Тя живота́ вем и храни́тельницу тве́рду, Де́во, и напáстей решáщу молвы́, и нало́ги бесо́в отгоня́ющу; и молю́ся всегда́, от тли страсте́й мои́х избáвити мя.

Тропарь: Я́ко сте́ну прибе́жища стяжáхом, и душ всесоверше́нное спасе́ние, и прострáнство в ско́рбех, Отрокови́це, и просвеще́нием Твои́м при́сно рáдуемся: о, Влады́чице, и ны́не нас от страсте́й и бед спаси́.

Тропарь: На одре́ ны́не немощству́яй лежу́, и несть исцеле́ния пло́ти мое́й: но, Бо́га и Спáса ми́ру и Избáвителя неду́гов ро́ждшая, Тебе́ молю́ся, Благо́й: от тли неду́г возстáви мя.

Песнь 7:

Ирмос: От Иуде́и доше́дше о́троцы,/ в Вавило́не иногдá,/ ве́рою Тро́ическою плáмень пе́щный попрáша, пою́ще:// отце́в Бо́же, благослове́н еси́.

Припев: Пресвята́я Богоро́дице, спаси́ нас.

Тропарь: На́ше спасе́ние я́коже восхоте́л еси́, Спáсе, устро́ити, во утро́бу Де́выя всели́лся еси́, Ю́же ми́ру предстáтельницу показа́л еси́: оте́ц на́ших Бо́же, благослове́н еси́.

Тропарь: Воли́теля ми́лости, Его́же родилá еси́, Мáти чи́стая, умоли́ избáвитися от прегреше́ний и душе́вных скверн ве́рою зову́щим: оте́ц на́ших Бо́же, благослове́н еси́.

Тропарь: Сокро́вище спасе́ния и Исто́чник нетле́ния, Тя Ро́ждшую, и столп утвержде́ния, и дверь покая́ния, зову́щим показа́л еси́: оте́ц на́ших Бо́же, благослове́н еси́.

Тропарь: Теле́сныя сла́бости и душе́вныя неду́ги, Богороди́тельнице, любо́вию приступáющих к кро́ву Твоему́, Де́во, исцели́ти сподо́би, Спáса Христа́ нам ро́ждшая.

Песнь 8:

Ирмос: Царя́ Небе́снаго,/ Его́же пою́т во́и А́нгельстии,// хвали́те и превозноси́те во вся ве́ки.

Припев: Пресвята́я Богоро́дице, спаси́ нас.

Тропарь: По́мощи я́же от Тебе́ тре́бующия не пре́зри, Де́во, пою́щия и превознося́щия Тя во ве́ки.

Тропарь: Неможе́ние души́ моея́ исцеля́еши и теле́сныя боле́зни, Де́во, да Тя прослáвлю, Чи́стая, во ве́ки.

Тропарь: Исцеле́ний бога́тство изливáеши ве́рно пою́щим Тя, Де́во, и превознося́щим неизрече́нное Твое́ рождество́.

Тропарь: Напáстей Ты прило́ги отгоня́еши и страсте́й нахо́ды, Де́во: те́мже Тя пое́м во вся ве́ки.

Песнь 9:

Ирмос: Вои́стинну Богоро́дицу/ Тя испове́дуем,/ спасе́ннии Тобо́ю, Де́во чи́стая,// с безпло́тными ли́ки Тя величáюще.

Припев: Пресвята́я Богоро́дице, спаси́ нас.

Тропарь: То́ка слез мои́х не отврати́ся, Я́же от вся́каго лица́ вся́ку сле́зу отъе́мшаго, Де́во, Христа́ ро́ждшая.

Тропарь: Ра́дости мое́ се́рдце испо́лни, Де́во, Я́же ра́дости прие́мшая исполне́ние, грехо́вную печа́ль потребля́ющи.

Тропарь: Пристáнище и предстáтельство к Тебе́ прибегáющих бу́ди, Де́во, и стена́ неруши́мая, прибе́жище же и покро́в и весе́лие.

Тропарь: Све́та Твоего́ заря́ми просвети́, Де́во, мрак неве́дения отгоня́ющи, благове́рно Богоро́дицу Тя испове́дающих.

Тропарь: На ме́сте озлобле́ния не́мощи смири́вшагося, Де́во, исцели́, из нездрáвия во здрáвие претворя́ющи.

Кано́н Пресвято́й Богоро́дицы из Окто́иха, глас 8

Песнь 1:

Ирмос: Колесницегони́теля фарао́ня погрузи́/ чудотворя́й иногда́/ Моисе́йский же́зл, крестообра́зно порази́в,/ и раздели́в мо́ре./ Изра́иля же беглеца́ пешехо́дца спасе́,// пе́снь Бо́гови воспева́юща.

Припев: Пресвята́я Богоро́дице, спаси́ нас.

Тропарь: Ско́рбных наведе́ния обурева́ют смире́нную мою́ ду́шу, и напа́стей о́блацы мое́ покрыва́ют се́рдце, Богоневе́стная. Но Све́т ро́ждшая Боже́ственный и Преве́чный, возсия́й мне́ све́т ра́достный.

Тропарь: От безме́рных ну́ждей и скорбе́й и от враго́в лю́тых, и напа́стей жите́йских изба́влься, Всепречи́стая, кре́пкою си́лою Твое́ю, воспева́ю, велича́ю безме́рную Твою́ ми́лость, и е́же ко мне́ Твое́ утеше́ние.

Тропарь: Ны́не наде́яся, к Твоему́ прибего́х заступле́нию кре́пкому, и к Твоему́ покро́ву вседу́шно притеко́х, и коле́на приклоня́ю, Влады́чице, и пла́чу, и стеню́, не пре́зри мене́ окая́ннаго, христиа́ном прибе́жище.

Тропарь: Не умолчу́ вопи́ти ясне́йше вели́чия Твоя́. А́ще бо не Ты́, Отрокови́це, всегда́ предстоя́ла еси́ о мне́ моля́щи Сы́на Твоего́, кто́ бы от толи́кия бу́ри, и лю́тых бе́д изба́вил мя́.

Песнь 3:

Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты́ мене́ утверди́ в любви́ Твое́й,/ жела́ний кра́ю, ве́рных утвержде́ние,// еди́не Человеколю́бче.

Припев: Пресвята́я Богоро́дице, спаси́ нас.

Тропарь: Недоуме́вый от все́х, боле́зненно зову́ Ти: предвари́ те́плое предста́тельство, и Твою́ по́мощь да́ждь ми́ рабу́ Твоему́ смире́нному и окая́нному, Твоего́ заступле́ния и́щущему те́пле.

Тропарь: Удиви́ла еси́ вои́стинну ны́не на мне́, Влады́чице, благодея́ния Твоя́, Отрокови́це, и ми́лости Твоя́. Те́мже сла́влю Тя́, и воспева́ю, и почита́ю мно́гое и безме́рное смотре́ние Твое́.

Тропарь: Бу́ря мя́ обурева́ет напа́стей, Влады́чице, и ско́рбных треволне́ния погружа́ют: но предвари́вши ру́ку ми́ да́ждь по́мощи, те́плое заступле́ние, и предста́тельство Твое́.

Тропарь: И́стинную Богоро́дицу испове́дую, Влады́чице, Тя́ сме́рти держа́ву потреби́вшую, я́ко бо оживля́ющая, от у́з а́довых к животу́ возвела́ еси́ мя́, в зе́млю те́кшаго.

Песнь 4:

Ирмос: Ты́ моя́ кре́пость Го́споди,/ Ты́ моя́ и си́ла,/ Ты́ мо́й Бо́г, Ты́ мое́ ра́дование,/ не оста́вль не́дра О́тча,/ и на́шу нищету́ посети́в./ Те́м с проро́ком Авваку́мом зову́ Ти:// си́ле Твое́й сла́ва, Человеколю́бче.

Припев: Пресвята́я Богоро́дице, спаси́ нас.

Тропарь: И где́ про́чее ино́е обря́щу заступле́ние? Ка́мо прибе́гну? Где́ же и спасу́ся? Ку́ю те́плую возы́мам помо́щницу, скорбьми́ жите́йскими и бу́рями, увы́ мне́, коле́блему? На Тя́ еди́ну упова́ю, и дерза́ю, и хвалю́ся, и притека́ю к покро́ву Твоему́, спаси́ мя́.

Тропарь: Реку́ сла́дкую ми́лости Твоея́, бога́тыми дарми́ ороси́вшую, всеокая́нную и смире́нную ду́шу мою́, Всечи́стая, напа́стей и скорбе́й пе́щию сожже́нную, велича́ю, пропове́дую и притека́ю к покро́ву Твоему́, спаси́ мя.

Тропарь: Тя́ Чи́стую, Тя́ Де́ву и Нескве́рную, еди́ну и́мам сте́ну необори́мую, прибе́жище, покро́в кре́пкий, ору́жие спасе́ния. Не пре́зри мене́ блу́днаго, наде́ждо ненаде́емых, немощству́ющих по́моще, оскорбля́емых ра́досте и заступле́ние.

Тропарь: Ка́ко изрещи́ Твоя́ по досто́инству возмогу́ безме́рныя щедро́ты, о Влады́чице, я́же мою́ всегда́ ду́шу лю́те оскорбля́емую, я́ко во́ды обыше́дшия? Но, о Твоего́ про́мысла и благодея́ния, его́же безу́мно окая́нный погуби́х!

Песнь 5:

Ирмос: Вску́ю мя́ отри́нул еси́/ от лица́ Твоего́, Све́те незаходи́мый,/ и покры́ла мя́ е́сть чужда́я тьма́ окая́ннаго?/ Но обрати́ мя́ и к све́ту за́поведей Твои́х// пути́ моя́ напра́ви, молю́ся.

Припев: Пресвята́я Богоро́дице, спаси́ нас.

Тропарь: Благода́рно вопию́ Ти: ра́дуйся, Ма́ти Де́во; ра́дуйся, Богоневе́сто; ра́дуйся, Боже́ственный покро́ве; ра́дуйся, ору́жие и стено́ неруши́мая; ра́дуйся, предста́тельство и по́моще и спасе́ние, и́же к Тебе́ притека́ющим ве́рою.

Тропарь: Ненави́дящии мя́ всу́е, стре́лы и мечи́ и ро́в угото́ваша, и и́щут всеокая́ннаго моего́ те́ла исто́ргнути, и низвести́ в зе́млю жела́ют, но от си́х, Чи́стая, предвари́вши спаси́ мя.

Тропарь: Ки́й Тебе́ да́р принесу́ благодаре́ния, за я́же наслади́хся Твои́х дарова́ний, и Твоея́ безме́рныя благосты́ни? Те́мже у́бо сла́влю, песносло́влю и велича́ю Твою́ неизрече́нную ко мне́ ми́лость.

Песнь 6:

Ирмос: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зо́л душа́ моя́ испо́лнися,/ и живо́т мо́й а́ду прибли́жися,/ и молю́ся я́ко Ио́на:// от тли́, Бо́же, возведи́ мя.

Припев: Пресвята́я Богоро́дице, спаси́ нас.

Тропарь: О́блацы ско́рбных покры́ша окая́нную мою́ ду́шу и се́рдце, и помраче́ние вво́дят мне́, Отрокови́це, но ро́ждшая Све́т Непристу́пный, изжени́ сия́ дале́че, дохнове́нием Боже́ственныя моли́твы Твоея́.

Тропарь: Утеше́ние в ско́рбех ве́м, и неду́гов врача́ Тя зна́ю, и всесоверше́нное сокруше́ние сме́рти, и реку́ живота́ неизчерпа́емую, и все́х су́щих в напа́стех ско́рое и бы́строе заступле́ние.

Тропарь: Не скрыва́ю глубины́ Твоея́ ми́лости, и то́к безме́рных чуде́с, и исто́чник приснотеку́щий вои́стинну, я́же ко мне́ ми́лости Твоея́, Влады́чице, но все́м испове́дую, и вопию́, и пропове́дую, и веща́ю.

Тропарь: Обыдо́ша мя́ жите́йския бу́ри, я́ко пче́лы со́т, Де́во, и мое́ содержа́щия се́рдце уязвля́ют стре́лы скорбе́й, но да обря́щу Тя́ помо́щницу, и гони́тельницу, и изба́вительницу, Всепречи́стая.

Песнь 7:

Ирмос: О́троцы евре́йстии в пещи́/ попра́ша пла́мень дерзнове́нно,/ и на ро́су о́гнь преложи́ша, вопию́ще:// благослове́н еси́, Го́споди Бо́же, во ве́ки.

Припев: Пресвята́я Богоро́дице, спаси́ нас.

Тропарь: Све́т ро́ждшая, Богоро́дице, помраче́на мя́ но́щию грехо́в просвети́ Ты́, Све́та су́щи прия́телище чи́стое и непоро́чное, да любо́вию Тя́ сла́влю.

Тропарь: Покро́в бу́ди и предста́тельство, и заступле́ние, и похвала́, Де́во, обнаже́ну мне́ ны́не вся́кия по́мощи, безпо́мощных си́ло и наде́ждо ненаде́емых.

Тропарь: Все́ю душе́ю и мы́слию, и се́рдцем и устна́ми Тя́ сла́влю, наслади́вся Твои́х вели́ких дарова́ний: но, о Твоея́ благосты́ни, и безме́рных Твои́х чуде́с!

Тропарь: Ви́ждь ми́лостивым о́ком Твои́м, и посети́ озлобле́ние е́же и́мам, и лю́тых напа́стей и вре́да и бе́д, и от искуше́ний мя́ изба́ви безме́рною ми́лостию Твое́ю.

Песнь 8:

Ирмос: На горе́ святе́й просла́вльшася,/ и в купине́ огне́м Присноде́вы/ Моисе́ови та́йну я́вльшаго,/ Го́спода по́йте,// и превозноси́те во вся́ ве́ки.

Припев: Пресвята́я Богоро́дице, спаси́ нас.

Тропарь: Благоутро́бия ра́ди ми́лости Твоея́, Де́во, не пре́зри, Чи́стая, потопля́емаго мене́ бу́рею жите́йских во́лн, но да́ждь ми́ ру́ку по́мощи, утесня́ему озлобле́ньми жите́йскими.

Тропарь: Обстоя́ния и ско́рби и ну́жды обрето́ша мя́, Чи́стая, и напа́сти жите́йския, и искуше́ния отвсю́ду мя́ обыдо́ша. Но предста́ни ми́, и заступи́ мя кре́пким Твои́м покро́вом.

Тропарь: В бу́рях да обря́щу Тя́ приста́нище, в печа́лех ра́дость и весе́лие, и в неду́зех ско́рую по́мощь, и в беда́х изба́вительницу, и предста́тельницу во искуше́ниих.

Тропарь: Ра́дуйся, Престо́ле огнеобра́зный Госпо́день; ра́дуйся, Боже́ственная и манноприе́мная ру́чко; ра́дуйся, златы́й свети́льниче, свеще́ неугаси́мая; ра́дуйся, де́вам сла́во, и ма́терем украше́ние и похвало́.

Песнь 9:

Ирмос: Ужасе́ся о се́м не́бо,/ и земли́ удиви́шася концы́,/ я́ко Бо́г яви́ся челове́ком пло́тски,/ и чре́во Твое́ бы́сть простра́ннейшее небе́с:/ те́м Тя́ Богоро́дицу,// а́нгелов и челове́к чинонача́лия велича́ют.

Припев: Пресвята́я Богоро́дице, спаси́ нас.

Тропарь: К кому́ прибе́гну ино́му Чи́стая? Где́ притеку́ про́чее, и спасу́ся? Ка́мо иду́? Ко́е же обря́щу прибе́жище? Ко́е те́плое заступле́ние? Ку́ю в ско́рбех помо́щницу? На Тя́ еди́ну упова́ю, и о Тебе́ еди́ней хвалю́ся, и на Тя́ дерза́я прибего́х.

Тропарь: Не́сть исчи́слити возмо́жно вели́чия Твоя́, Богоневе́сто, и глубину́ неиспыта́тельну изрещи́, па́че ума́ чуде́с Твои́х, соверше́нных вы́ну любо́вию Тя́ чту́щим, и ве́рою покланя́ющимся, я́ко вои́стинну Бо́га ро́ждшей.

Тропарь: В пе́снех благода́рных славосло́влю, и почита́ю безме́рную ми́лость, и мно́гую си́лу Твою́ все́м испове́дую, и благодея́ния Твоя́, я́же истощи́ла еси́ на мя́, пропове́дую, велича́ю душе́ю же и се́рдцем, и мы́слию, и язы́ком всегда́.

Тропарь: Моле́ние мое́ приими́ убо́гое, и пла́ча моего́ не пре́зри, и сле́з, и стена́ния, но заступи́ мя я́ко блага́я, и проше́ния испо́лни: мо́жеши бо вся́ я́ко Всемо́щнаго Влады́ки Бо́га Ма́ти, а́ще воззри́ши то́кмо моему́ окая́нному смире́нию.