Чин моле́бнаго пе́ния о вразумле́нии иму́щих наме́рение погуби́ти младе́нца во чре́ве

 

Богослужебное последование размещено

на сайте просветительского проекта

Последование Богослужений наряду https://Последование.РФ

Телеграм-канал сайта: https://t.me/posledovanie

Телеграм-чат сайта: https://t.me/ChatPosledovanie

Макс-канал сайта: https://max.ru/posledovanie

Группа сайта во ВКонтакте: https://vk.com/posledovanie

Поддержать проект: https://Последование.РФ/donate

Сбер: 2202 2011 1789 7005 | Т-банк: 5536 9137 5371 9885 | СБП: +7 912 174 7818

 

2025 г.

 

В данном последовании использован шрифт «TriodPostnaja». Ссылка для скачивания: https://ofont.ru/view/3381

 

 

26 декабря 2025 года Священный Синод Русской Православной Церкви одобрил к богослужебному использованию Чин молебного пения о вразумлении имущих намерение погубити младенца во чреве. Ранее, 30 октября 2025 года Священный Синод определил и постановил ежегодно 29 декабря ст.ст. / 11 января н.ст., в день памяти мучеников 14 000 младенцев, от Ирода в Вифлееме избиенных, повсеместно, с подобающим пояснением, включать в сугубую ектению Божественной литургии прошения из сугубой ектении данного молебна, а после сугубой ектении Божественной литургии – возносить молитву из утвержденного последования, а также по усердию и произволению настоятелей совершать в этот день и полный молебен по окончании Божественной литургии. В прочие дни года совершать данный молебен в ответ на поступающие обращения или согласно определенному графику по решению настоятелей и приходских советов (журнал 105 от 30.10.2025: https://www.patriarchia.ru/article/118012; журнал 134 от 26.12.2025: https://patriarchia.ru/article/119005; Чин: https://www.patriarchia.ru/article/119017).

 

Чин моле́бнаго пе́ния о вразумле́нии иму́щих наме́рение
погуби́ти младе́нца во чре́ве

 

Диакон:        Благослови́, влады́ко.

Иерей:      Благослове́н Бог наш, всегда́, ны́не и при́сно и во ве́ки веко́в.

 

Хор:    Ами́нь.

Диакон:        Сла́ва Тебе́, Бо́же наш, сла́ва Тебе́.

Хор:    Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

 

Трисвято́е по О́тче наш:

Чтец:  Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды)

            Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

            Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

            Го́споди, поми́луй. (Трижды)

            Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

            О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Иерей:      Я́ко Твое́ есть Ца́рство и си́ла и сла́ва Отца́ и Сы́на и Свята́го Ду́ха, ны́не и при́сно и во ве́ки веко́в.

Чтец:        Ами́нь. Го́споди, поми́луй. (12 раз)

            Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

            Прииди́те, поклони́мся Царе́ви на́шему Бо́гу.

            Прииди́те, поклони́мся и припаде́м Христу́, Царе́ви на́шему Бо́гу.

              Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 138:

Чтец:        Го́споди, искуси́л мя еси́ и позна́л мя еси́. Ты позна́л еси́ седа́ние мое́ и воста́ние мое́. Ты разуме́л еси́ помышле́ния моя́ издале́ча: стезю́ мою́ и у́же мое́ Ты еси́ изсле́довал, и вся пути́ моя́ прови́дел еси́. Я́ко несть льсти в язы́це мое́м: се, Го́споди, Ты позна́л еси́. Вся после́дняя и дре́вняя: Ты созда́л еси́ мя, и положи́л еси́ на мне ру́ку Твою́. Удиви́ся ра́зум Твой от мене́, утверди́ся, не возмогу́ к нему́. Ка́мо пойду́ от Ду́ха Твоего́? И от лица́ Твоего́ ка́мо бежу́? А́ще взы́ду на не́бо – Ты та́мо еси́, а́ще сни́ду во ад – та́мо еси́. А́ще возму́ криле́ мои́ ра́но и вселю́ся в после́дних мо́ря – и та́мо бо рука́ Твоя́ наста́вит мя и удержи́т мя десни́ца Твоя́. И рех: еда́ тма попере́т мя, и нощь просвеще́ние в сла́дости мое́й? Я́ко тма не помрачи́тся от Тебе́, и нощь, я́ко день, просвети́тся, я́ко тма ея́, та́ко и свет ея́. Я́ко Ты созда́л еси́ утро́бы моя́, восприя́л мя еси́ из чре́ва ма́тере моея́. Испове́мся Тебе́, я́ко стра́шно удиви́лся еси́: чу́дна дела́ Твоя́, и душа́ моя́ зна́ет зело́. Не утаи́ся кость моя́ от Тебе́, ю́же сотвори́л еси́ в та́йне, и соста́в мой в преиспо́дних земли́. Несоде́ланное мое́ ви́десте о́чи Твои́, и в кни́зе Твое́й вси напи́шутся, во днех сози́ждутся и никто́же в них. Мне же зело́ че́стни бы́ша дру́зи Твои́, Бо́же, зело́ утверди́шася влады́чествия их. Изочту́ их, и па́че песка́ умно́жатся; воста́х, и еще́ есмь с Тобо́ю. А́ще избие́ши гре́шники, Бо́же, му́жие крове́й, уклони́теся от мене́. Я́ко ревни́ви есте́ в помышле́ниих, прии́мут в суету́ гра́ды Твоя́. Не ненави́дящыя ли Тя, Го́споди, возненави́дех, и о вразе́х Твои́х иста́ях? Соверше́нною не́навистию возненави́дех я́, во враги́ бы́ша ми. Искуси́ мя, Бо́же, и уве́ждь се́рдце мое́, истяжи́ мя и разуме́й стези́ моя́, и виждь, а́ще путь беззако́ния во мне, и наста́ви мя на путь ве́чен.

            Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

            Аллилу́иа, аллилуиа, аллилуиа, слава Тебе, Боже. (Трижды)

 

Вели́кая ектения́:

Диакон:        Ми́ром Го́споду помо́лимся.

Хор:    Го́споди, поми́луй

Диакон:        О Свы́шнем ми́ре и спасе́нии душ на́ших, Го́споду помо́лимся.

         О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.

         О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.

         О Вели́ком Господи́не и Отце́ на́шем Святе́йшем Патриа́рхе КИРИ́ЛЛЕ, и о Господи́не на́шем Высокопреосвяще́ннейшем митрополи́те (или: архиепи́скопе, или: Преосвяще́ннейшем епи́скопе) имяре́к, честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.

         О Богохрани́мей стране́ на́шей, власте́х и во́инстве ея́, Го́споду помо́лимся.

         О гра́де сем (или: о ве́си сей), вся́ком гра́де, стране́ и ве́рою живу́щих в них, Го́споду помо́лимся.

         О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.

         О пла́вающих, путеше́ствующих, неду́гующих, стра́ждущих, плене́нных и о спасе́нии их, Го́споду помо́лимся.

 

         О е́же вразуми́тися бра́тиям и се́страм на́шим грехо́вным по́мыслом детоуби́йства обурева́емым, и о е́же изба́витися им от безрассу́днаго сего́ омраче́ния и в покая́ние и ра́зум и́стины приити́, Го́споду помо́лимся.

         О е́же стра́хом Свои́м огради́ти отцы́ и ма́тери, сро́дники их и вся о́крест их су́щия, малоду́шием, корыстолю́бием и неве́дением искуша́емыя, Го́споду помо́лимся.

         О е́же разуме́ти им во́лю Госпо́дню, благу́ю и всесоверше́нную, и да не пре́зрят еди́наго от ма́лых сих, младе́нец роди́тися иму́щих, Го́споду помо́лимся.

         О е́же дарова́тися им же и нам благо́му наме́рению друг дру́га тяготы́ носи́ти и та́ко испо́лнити зако́н Христо́в, Го́споду помо́лимся.

         О избáвитися и́м же и нaм от вся́кия ско́рби, гне́ва и нýжды, Го́споду помо́лимся.

 

         Заступи́, спаси́, поми́луй и сохрани́ нас, Бо́же, Твое́ю благода́тию.

         Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Хор:    Тебе́, Го́споди.

Иерей:      Я́ко подоба́ет Тебе́ вся́кая сла́ва честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор:    Ами́нь.

 

Бог Госпо́дь, глас 2:

Диакон:        Бог Госпо́дь, и яви́ся нам, благослове́н Гряды́й во И́мя Госпо́дне.

Стих 1:         Испове́дайтеся Го́сподеви, я́ко благ, я́ко в век ми́лость Его́.

Хор:    Бог Госпо́дь, и яви́ся нам, благослове́н Гряды́й во И́мя Госпо́дне. (И далее на каждый стих)

Стих 2:         Обыше́дше обыдо́ша мя, и И́менем Госпо́дним противля́хся им.

Стих 3:         Не умру́, но жив бу́ду, и пове́м дела́ Госпо́дня.

Стих 4:         Ка́мень, Его́же небрего́ша зи́ждущии, Сей бысть во главу́ у́гла, от Го́спода бысть Сей, и есть ди́вен во очесе́х на́ших.

 

Тропа́рь, глас 2:

Хор:    По о́бразу Твоему́ сотвори́вый челове́ки/ и повеле́вый им мно́житися на земли́,/ при́зри на лю́ди Твоя́/ и, в ве́ре, наде́жде и любви́ сия́ уцелому́дри,/ от греха́ чадогуби́тельнаго удержи́/ и к хране́нию за́поведей Твои́х приведи́,/ во е́же пе́ти Тя и сла́вити непреста́нно,// еди́не Человеколю́бче.

 

            Сла́ва Отцу́ и Сы́ну и Свято́му Ду́ху.

Тропа́рь, глас 2:

            Моли́твами святы́х младе́нец Вифлее́мских,/ беззако́нным повеле́нием от И́рода убие́нных,/ изба́ви зе́млю на́шу от безу́мнаго младе́нец во чре́ве убие́ния,/ и пода́ждь нам, Спа́се,// грехо́в оставле́ние и ве́лию ми́лость.

 

            И ны́не и при́сно и во ве́ки веко́в. Ами́нь.

Е́сли попра́зднство Роджества́ Христо́ва: тропа́рь пра́здника, глас 4:

            Рождество́ Твое́ Христе́ Бо́же наш,/ возсия́ ми́рови свет ра́зума:/ в нем бо звезда́м служа́щии,/ звездо́ю уча́хуся,/ Тебе́ кла́нятися Со́лнцу пра́вды,/ и Тебе́ ве́дети с высоты́ Восто́ка:// Го́споди, сла́ва Тебе́.

 

Е́сли вне попра́зднства Роджества́ Христо́ва: Богородичен, глас 2:

            Егда́ ко Елисаве́ти пришла́ еси́, Ма́ти Безневе́стная,/ тогда́ Предте́ча ра́достию взыгра́ся во чре́ве ея́/ и поклони́ся Бо́гу в Тебе́ все́льшемуся,/ сего́ ра́ди, Ми́лостивая,/ сохрани́ младе́нцы чревоноси́мыя от вся́каго зла,/ да похва́льная зове́м Ти:// благослове́нна Ты в жена́х еси́, Всенепоро́чная Влады́чице.

 

Диакон:        Во́нмем.

Иерей:      Мир всем.

Хор:    И ду́хови твоему́.

 

Диакон:        Прему́дрость, во́нмем.

Проки́мен, глас 4:

Чтец:        Проки́мен, глас четве́ртый: Вразуми́ мя, и научу́ся за́поведем Твои́м.

Хор:    Вразуми́ мя, и научу́ся за́поведем Твои́м.

 

Чтец:        Руце Твои сотвористе мя и создасте мя.

Хор:    Вразуми́ мя, и научу́ся за́поведем Твои́м.

 

Чтец:        Вразуми́ мя,

Хор:    И научу́ся за́поведем Твои́м.

 

Чте́ние Апо́стола:

Диакон:        Прему́дрость.

Чтец:        К Тимофе́ю посла́ния свята́го апо́стола Па́вла чте́ние.

 

Диакон:        Во́нмем.

Чте́ние Апо́стола (1Тим., зачч.281-282: гл.2, стт.1-4, 8-15):

Чтец:               Ча́до Тимофе́е, молю́ пре́жде всех твори́ти моли́твы, моле́ния, проше́ния, благодаре́ния за вся челове́ки, за царя́ и за вся, и́же во вла́сти суть, да ти́хое и безмо́лвное житие́ поживе́м во вся́ком благоче́стии и чистоте́. Сие́ бо добро́ и прия́тно пред Спаси́телем на́шим Бо́гом, И́же всем челове́ком хо́щет спасти́ся и в ра́зум и́стины приити́. Еди́н бо есть Бог, и еди́н хода́тай Бо́га и челове́ков, челове́к Христо́с Иису́с, да́вый Себе́ избавле́ние за всех. Хощу́ у́бо, да моли́твы творя́т му́жие на вся́ком ме́сте, возде́юще преподо́бныя ру́ки без гне́ва и размышле́ния. Та́кожде и жены́ во украше́нии ле́потном, со стыде́нием и целому́дрием да украша́ют себе́ не в плете́ниих, ни зла́том, или́ би́сером, или́ ри́зами многоце́нными, но е́же подоба́ет жена́м обещава́ющымся благоче́стию, делесы́ благи́ми. Жене́ же учи́ти не повелева́ю, ни владе́ти му́жем, но бы́ти в безмо́лвии. Ада́м бо пре́жде со́здан бысть, пото́м же Е́ва. И Ада́м не прельсти́ся, жена́ же прельсти́вшися, в преступле́нии бысть. Спасе́тся же чадоро́дия ра́ди, а́ще пребу́дет в ве́ре и любви́, и во святы́ни с целому́дрием.

Иерей:      Мир ти.

Чтец:        И ду́хови твоему́.

 

Диакон:        Прему́дрость.

Аллилуа́рий, глас 4:

Чтец:        Глас четве́ртый: Аллилу́иа, аллилу́иа, аллилу́иа.

Хор:    Аллилу́иа, аллилу́иа, аллилу́иа.

Чтец:        Сохрани́ мя, Го́споди, я́ко на Тя упова́х.

Хор:    Аллилу́иа, аллилу́иа, аллилу́иа.

Чтец:        Благословлю́ Го́спода, вразуми́вшаго мя.

Хор:    Аллилу́иа, аллилу́иа, аллилу́иа.

 

Диакон:        Прему́дрость, про́сти, услы́шим Свята́го Ева́нгелия.

Иерей:      Мир всем.

Хор:    И ду́хови твоему́.

 

Иерей:      От Ма́рка Свята́го Ева́нгелия чте́ние.

Хор:    Сла́ва, Тебе́, Го́споди, сла́ва Тебе́.

 

Чте́ние Ева́нгелия:

Диакон:        Во́нмем.

 

Чте́ние Ева́нгелия (Мк., из зачч.41 и 46: гл.9, стт.37-36, гл.10, стт.13-16):

Иерей:          Во вре́мя о́но, прии́мь Иису́с отроча́, поста́ви е́ посреде́ ученик Своих, и объе́м е́, рече́ им: и́же а́ще еди́но таковы́х отроча́т прии́мет во и́мя Мое́, Мене́ прие́млет, и и́же Мене́ прие́млет, не Мене́ прие́млет, но Посла́вшаго Мя. И приноша́ху к Нему́ де́ти, да ко́снется их, ученицы́ же преща́ху принося́щим. Ви́дев же Иису́с негодова́ и рече́ им: оста́вите дете́й приходи́ти ко Мне и не брани́те им, таце́х бо есть Ца́рствие Бо́жие. Ами́нь глаго́лю вам, и́же а́ще не прии́мет Ца́рствия Бо́жия я́ко отроча́, не и́мать вни́ти в не. И объе́м их, возло́жь ру́це на них, благословля́ше их.

Хор:    Сла́ва, Тебе́, Го́споди, сла́ва Тебе́.

 

Ектения́ сугу́бая:

Диакон:        Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Хор:    Го́споди, поми́луй. (Трижды, на каждое прошение)

Диакон:        Еще́ мо́лимся о Вели́ком Господи́не и Отце́ на́шем Святе́йшем Патриа́рхе КИРИ́ЛЛЕ, и о Господи́не на́шем Высокопреосвяще́ннейшем митрополи́те (или: архиепи́скопе, или: Преосвяще́ннейшем епи́скопе) имяре́к, и всей во Христе́ бра́тии на́шей.

         Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

 

         К Тебе́, Го́споду и Творцу́ вся́ческих, припа́даем и се́рдцем сокруше́нным вопие́м: изба́ви Оте́чество на́ше и вся лю́ди Твоя́ от вели́каго сего́ нече́стия, е́же проти́ву во́ли Твоея́ и естества́ челове́ческаго ча́да во утро́бе су́щия умерщвляя́ти, и возста́ви наро́д Тво́й во благоче́стии и умно́жи его́ на земли́, мо́лим Ти ся, Всеси́льне Царю́, ско́ро услы́ши и поми́луй.

         Просвеща́яй вся́каго челове́ка, гряду́щаго в мир, и согреша́ющих в ра́зум и́стины приводя́й, просвети́ благода́тию Твое́ю сердца́ бра́тий и сесте́р на́ших, и в разуме́ние во́ли Твоея́ приведи́, от греха́ чадоуби́йства отврати́, в чадоро́дии благослови́, мо́лим Ти ся, Всеще́дре Го́споди, ско́ро услы́ши и поми́луй.

         Храня́й младе́нцы, Го́споди, Сы́на Твоего́ Единоро́днаго во искупле́ние на́ше да́вый и от Чи́стыя Богоотрокови́цы и Присноде́вы Мари́и вочелове́читися Тому́ благоволи́вый, сохрани́ жи́зни младе́нец, во чре́ве су́щих, и благода́тным заступле́нием Твои́м от сме́рти, неду́га и вся́кия па́губы, наипа́че же от зла́го произволе́ния челове́ческаго огради́ их и к рожде́нию предугото́ви, мо́лим Ти ся, О́тче щедро́т и Бо́же вся́каго утеше́ния, ско́ро услы́ши и поми́луй.

         Апо́стольским сло́вом повеле́вый нам друг дру́га тяготы́ носи́ти и та́ко испо́лнити зако́н Христо́в, укрепи́ сро́дники и домоча́дцы жен, во чре́ве иму́щих, сле́довати пра́вде Твое́й, мо́лим Ти ся, услы́ши и поми́луй.

         Не хотя́й сме́рти гре́шных, но е́же обрати́тися и живы́м им бы́ти и благоугожда́ти пред Тобо́ю, умудри́ и врачи́ к почте́нию свяще́нного да́ра жи́зни, от Тебе́ низпосыла́емаго, и да не обагряя́тся ру́ки их проли́тием непови́нныя кро́ве младе́нец Твои́х, мо́лим Ти ся, Спаси́телю ми́ра, ско́ро услы́ши и поми́луй.

 

Иерей:      Услы́ши ны, Бо́же, Спаси́телю наш, упова́ние всех конце́в земли́, и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны: Ми́лостив бо и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Хор:    Ами́нь.

 

Диакон:        Го́споду помо́лимся.

Хор:    Го́споди, поми́луй.

 

Моли́тва:

Иерей:      Влады́ко Го́споди Иису́се Христе́ Бо́же наш, сотвори́вый челове́ка по о́бразу Твоему́ и по подо́бию, му́жеский пол и же́нский, и благослови́вый я́ и реки́й: Расти́теся и мно́житеся и напо́лните зе́млю, и Псалмопе́вцем Твои́м откры́вый, я́ко Сам еси́ устроя́яй ко́сти и вся вну́тренняя коего́ждо еще́ во чре́ве ма́тери его́, И́же и в вочелове́чении Твое́м от Ду́ха Свя́та и Мари́и Присноде́вы и Богоро́дицы во утро́бу Ея́ всели́выйся и в челове́цех роди́тися благоволи́вый!

         При́зри на моле́ние сие́, ны́не Тебе́ на́ми возноси́мое, и све́том Твоего́ богоразу́мия просвети́ ма́тери чревонося́щия. Теплото́ю любве́ Твоея́ согре́й сердца́ их е́же возлюби́ти ча́да их и воспита́ти во сла́ву Твою́, возвесели́тися же и виде́нием вну́к и пра́внук свои́х. Огради́ их от по́мысл неве́рия, самолю́бия, омраче́ния грехо́внаго и лука́выя боя́зни, да не вни́дет се́рдце их па́губное наме́рение погуби́ти носи́мыя под се́рдцем младе́нцы!

         Вразуми́ же и укрепи́ вся сро́дники и зна́емыя их, наипа́че же отцы́ чад, во чре́ве су́щих, да не омрача́тся сердца́ их малоду́шием и да не оскверняя́тся уста́ их лука́вым сове́тованием детоуби́йства.

         Страх Твой благи́й всади́ в сердца́ враче́й и сохрани́ их от корыстолю́бия, неве́рствия и жестосе́рдия, а наипа́че же от убие́ния нерожде́нных младе́нец.

         Укрепи́ вла́сти предержа́щия Оте́чества на́шего к прекраще́нию вели́каго сего́ нече́стия убие́ния нерожде́нных младе́нец. Всем же в вере и благоче́стии подвиза́ющимся благода́тию Твое́ю благопоспеши́ и спасе́ния вене́ц нетле́нен угото́ви, да та́ко вси в тишине́ и благоче́стии пожи́вше и Тебе́ благоугоди́вше, сподо́бимся ча́сти избра́нных в Тебе́, Бо́зе и Спаси́теле на́шем: Тебе́ бо честь и поклоне́ние подоба́ет с Собезнача́льным Твои́м Отце́м и со Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.

Хор:    Ами́нь.

 

Диакон:        Прему́дрость.

Иерей:      Пресвята́я Богоро́дице, спаси́ нас.

Хор:    Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

 

Иерей:      Сла́ва Тебе́, Христе́ Бо́же, Упова́ние на́ше, сла́ва Тебе́.

Хор:    Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь. Го́споди, поми́луй. (Трижды) Благослови́.

 

Отпу́ст:

Иерей:      [И́же в верте́пе роди́выйся, и в я́слех возлеги́й, на́шего ра́ди Спасе́ния,] Христо́с, И́стинный Бог наш, моли́твами Пречи́стыя Своея́ Ма́тере, честнаго славнаго пророка Предтечи и Крестителя Иоанна, святых мучеников младенцев Вифлеемских и всех святы́х, поми́лует и спасе́т нас, яко Благ и Человеколю́бец.

 

Хор:    Ами́нь. Го́споди, поми́луй. (Трижды)